- مسا الخير استاذي/ انا الدكتورة...
- هلا صباح النور يا دكتورة
- اهلا استاذي كيفك
- منيح، بخير من الله، وانت؟
- الحمد لله.. شو اخر اخبار البلد
- جخة، في أحسن من هيك؟
- ان شاء الله يكون ـ أحسن
- ان شاء الله، طيب ليه الناس رافضة التعديل الجديد؟ وليه ما نوافق ونطالب بالمزيد؟
- وليش ما نحصل على المزيد؟ احنا بنشحد إصلاح؟
- والله استاذي انا معك بس اليوم قرأت مقالا يقول انه البرلمان والاحزاب الآن غير مؤهلة للحكومة البرلمانية، شو رأيك انت استاذ وما بعرف اذا قرأت المقال او لا..
- هذا كلام فارغ.. شو مش مؤهلة..؟ اللي مش مؤهل ولسه مش ناضج يحكي عن حاله، لما يبلغ يطالب بالاصلاح!
- بس شو رأيك انت لو الاخوان شكلوا الحكومة البرلمانية ؟
- شو يعني؟ مالهم الاخوان؟ جربوهم بعدين احلقوا لهم
- يعني كيف راح يتعاملوا مع العالم؟
- دكتورة..
- نعم استاذي..
- لا تصدقي كل اللي بحكوه .. هاي حجج فارغة
- والله ممكن .. بس انا حابب استفيد منك واحكي وجهه نظري، ليش ما نتقبل التعديلات الدستورية ونحاول نكون برلمان قوي واحزاب فاعلة وبعدين نطلب الحكومة البرلمانية انا هي وجهة نظري!!.. بصراحة والله انا مع الانتقال الى ان يحكم الشعب نفسه من خلال الحكومة البرلمانية وان يكون الشعب هو مصدر السلطات وان نحافظ على النظام الهاشمي رأسا للدولة لكن انا مع القول الذي يقول اننا في الاردن الان نحتاج اولا لبرلمان قوي ومستقل ومن ثم الانتقال الى ما بعد، انا درست بالسويد 7 سنوات وبعرف اصول الديمقراطية الصح، صعب عندنا هو ننتقل الها فجأة
- كيف فجأة؟ صار لهم بتعلموا فينا ستين سنة..
- يعني ان تشكل الأغلبية الحكومة وتكون هذه الاغلبية هم ابناء الذوات وهم ابناء النواب وهم القادرون الآن على الوصول الى البرلمان بحكم انه المال السياسي الآن هو المسيطر اذا صعب وانت شاهدت ثقة ال 111 ومن ثم الشعب يسقط الحكومة..
- انا مش مقتنع باللي بتحكيه، كلها حجج فارغة مشان بس يستأثروا بالحكم، ويهمشوا الناس، الديمقراطية بتعالج اخطاءها بنفسها.
- يعني كتير كلامك مقنع بس والله انا بشوف انا بدنا وقت بعدين ننتقل الى الحكومة البرلمانية، المهم الان هو تشكيل برلمان قوي مستقل وبعدين الحكومة البرلمانية.. على العموم.. ويا ريت يكون عندك وقت كل فترة هيك نتحاور معك، انا مسافرة على بروكسل غدا لمدة اسبوع لحضور مؤتمر طبي هناك
- بالسلامة، نتشرف حسب التساهيل، تروحي وتيجي بالسلامة ..
- مع السلامة استاذي والى لقاء قريب بحاول اشبك معك من بروكسل!

الدستور