عليش تخطم جوا السوق
وميل يوخذ بندورة
صَبَّح مقهور ومخنوق
وكلْ اشكاله مقهورة
اسعار الخضرة مثل النار
والرواتب مهدورة
قال : البندورة بقديش
قلوا البايع بلزمكيش
*****
اصلو البايع عرف عليش
وبعرف انه من الدرَاويش
والبندورة بدينارين..
ويجيب عليش السعر منين!!
قلو تسهل بدنا نبيع ..
وَرِّينا كتافك يلّا...
عليش تطلعْ بالبياعْ
وقلوْ بطلعلكْ والله !!
إحنا اولاد الحراثين
عِنّا اخلاق وعِنّا دينْ
وشكلكْ عالدنيا هَجين.
******
وسار عليش وْيتْمَكَتْ
كان مفكر يقلي بيضْ
ويحط البندورة بجنبُه
أوْ يعْمَلْ قلاية بزيتْ
وهايْ الأطيبْ عَ قلْبُه
مش قادِرْ ويجيب منينْ
وصار ينافخ من غُلْبُه
ساق حماره وصار يقول
ويحتشي ويشكي لَرَبُه:

كُنَا نزرع بندورة
نوكل ونبيع المحصول
وكل العيلة مستورة
طاح السعر وظل يطيحٍ
وْطِحْنَا لقاع الجورة
وْحَوَلْنَا نزرع بطيخ
وصار البطيخ بقرشين
وقلنا نزرع بيتنجان
طَبْ بروحي وعقلي جْنَانْ
بعنا الارض بالمجانْ
وْدُرْنا نعمل عند فلان

وفجأة عليش بنص السوق
وهو يُحْسُبْ : شقلب من فوقْ
فَزَعُوا الناسْ وصاحو الناس
طولوْ عليش وجروْ عليشْ
تحت السيارة مدعوس
وحمارُه مرمي بجنبه
نزل السايق شكله بيك
مش سائل ومِنْكِر ذَنْبُه
بحتشي وبلوِّم بعليشْ
عقلك وين؟ وعينك وين؟
انت منين؟
واسمك إيش؟

جندي الاسعاف بسرعة:
ارفع ايدك ..مد اجريك ..،،
شالو عليش.. ومش صاحي
شرطي السير أَخَذْ (كْروكه)
الحقْ مبِيِّنْ لِبْسْ عليشْ
قال البيك انا مستعجلْ
خبرني شو معكوا بصير
بالمخفر حجزوا الحمارْ
ودُّوا جلاله عند الدارْ
فاق عليش من الصدمة
طَلْ !! بجنبه في شرطيْ
بالمستشفى في تفتيش
بإيده قيدْ... وبإجره قيدْ
وحس جنابه في تكسير
ومش قادر ينهض حالهْ..
قَلُّه شو قاعد بصير!؟
وين حماري واغراضي؟
قله الشرطي: اخطيتْ كثيرْ
وصادم سيارة لِكْبِيرْ
حضِّرْ حالكْ للجلسة..
فصيل الجيشْ
قادوا عليشْ..

******
قله القاضي يابني ليش!!
بتمشي بسرعة كثير كثير
وْطاعِجْ سيارة لِكْبِيرْ
ذنبك بالقانون كبير
ست شهور الحق العام
وْصَلِحْ سيارة لِكْبِيرْ..

نطْ حمار عليش وصارْ
ينَهِق وِيعاقِطْ الحمار
قله عليش : هِيييشْ .. هِيييشْ
اذا ناويْ ارَقيكْ قْدِيشْ
ضلكْ ساكتْ ما تحكيشْ