ملعون أبو الحياة يا عاطف ..!! قبل شوية أدركتُ أننا نلهثُ خلف الإسمنت كي نعيش فيه ..!! لماذا أتيت من هناك لتخبرني بكل هذا ..؟؟ هو أنا ناقصك يا شيخ ..؟؟ حرام عليك ..!! كنت أعتقد أن الدنيا لسّة بخير ..طلعت مش بخير ولا بشر ؛ بس بإشيْ ثالث ؛ شو هو ..والله لا أعلم ..!! صعب جداً على الانسان أن يمشي في اتجاه واحد ..وإذا خربط ؛ يكون مطلوب منه أن يعود من أوّل و جديد .. هي قليلة يا عاطف الأول وجديد هاي ..وإنت حكيت المسافة مش قليلة ..يعني الأحسن يتوكّد قبل ما ياخذ المسرب ..صح زي ما أنا متذكر يا عاطف وإلاّ أكون خبصت ..!! عاطف ..يا فرّاية ..أنا حزين جدا على القراء ..لأنهم مش فاهمين شي من إللي أقولو ..أرجوك خلّيني أوضح شوية ..لأني مش معود قرّائي على هيك ..جلدي بحكني يا عاطف ..لازم أحكي ..لازم تعرف شوية ..!! طيّب عندي حل يرضيني و يرضيك ..!! شو رأيك إنت إللي تحكي ..؟؟ بس على شرط ؛ بتحكي زي الحكي إللي حكيتلي إيّاه بكافتريا ( حمادة ) يوم الأربعاء ..وبالتحديد وإنت بتمعط في صحن الفول ..وأنا مسامحك بالحكي إللي وإنت بتمعط بصحن الكنافة ..!! شو رأيك ..؟؟ أستنى حكيك وإلا لأ ..؟؟ طبعاً أيها القراء ..مش رح أحكي شو إللي صار بيني وبين عاطف ..وأنتظره بأن يحن على حضرة جنابي و يحكي هو إللي صار ..ولكن لتوضيح أمر ما ؛ أقول الآتي فقط : عاطف الفراية ..مبدع كركي ( لاحظوا كركي ؛ مهو أنا وين ما أروح الكركية ( كِتْبَة ) عليّ ..!! ) ..المهم ..ورغم إنو كركي ..بس كمان ابن مخيّم ..ورغم ذلك أيضاً فهو يتقن اللهجة المدنية ويستطيع أن ( يُدحّي و يهيجن ) بهذه اللهجة ..!! حرمته قساوة رأسه من إثبات وجوده الإبداعيّة في الأردن ..رغم أن ( أقرانه وإللي بعدهم وإللي بعد بعدهم ) صاروا وصاروا ..هو يكتب النص المسرحي بامتياز وله به اجتهادات أحاول أن أفهمها ..ولكنه أيضا شاعر ..لم أذق من شعره إلاّ القليل ..لجأ في الآونة الأخيرة إلى المقالة ..وحسب ظنّي ؛ هو يكتب المقالة الساخرة بشكل ( لزيز ) بحيث إنو يلز عليك بدون ما يشحط بريك ....!! أخطر معلومة ..عاطف الفراية ..يعيش في الإمارات ..تعرفت عليه قبل أشهر وقت البرد على الأنترنت و أحرقنا معاً موقعين وتدفأنا عليهما ..من يومها وأنا أنتظر زيارته للأردن ..فعلها وجاء ..رأيته الأربعاء الماضي ..كنت أعتقد أنه في منتصف الشباب ..ولكن اعتقادي خاب ..رأيت شاباً في منتصف أرذل العمر ..هو يذوي شيئاً فشيئاً من الحسرة والألم ..لكنه معجون بالحكمة وبالتجربة ..!! أتمنى أن يلبي مطلبي ..ويكتب لكم غداً ..عن لقائي به ..مشان الله رد يا عاطف ..!!