عمون - تعرض نجل جلال الرحاحلة لحادث سير خلال ذهابه إلى الجامعة الهاشمية بباص الجامعة.

وروى الرحاحلة عبر حسابه الشخصي تفاصيل ما جرى مع نجله بعد تعرضه للحادث، مستغربا طلب احدهم من نجله بعد تعرضه للحادث أن "يقول وقعت في الجامعة".

وتاليا نص ما كتب الرحاحلة:

باليد والا بالحديد حسب طلب الجامعة الهاشمية

صباح اليوم رن ابني يا ابوي صار معنا حادث بباص الجامعة وهيني بمستشفى الزرقاء فطيت من النوم زي المجنون وركبت السيارة وعلى الزرقاء وطول الطريق وانا اطمن لما أوصلت المستشفى وصفيت صوبت هوشه مع امن المستشفى ممنوع توقف روح على الكراج يعمي بدي اطممن على ابني بس شويه ولا حياة لمن تنادي تركت السيارة ودخلت.

وانا بالطريق بحكي ابني بقول اجا واحد وطلب منه يقول أوقعت بالجامعة وسالت ابني مين معك من الجامعة قال ولا حد ولما أوصلت واطمأنت عليه ولا كاين سعادة عطوفة عميد شؤون الطلبة واصل قبلي بدقائق ومش مكلف خاطره عطوفته يبعث ناس يتفقد الطلاب ولا اذا ابني ما كان معه فلوس تكفى للدفع للمستشفى ما انتوا تعرفوا حوادث السير ما يتعالج اما يدفع وهون مصيبة.

بالنهاية لما حكيت عنوان الخبر لأنه حكالي ابني والفزعة شباب الجامعة لتركوا محاضراتهم وهمه لحقوا على المستشفى قبل ادارة الجامعة وكان هم الإدارة عدم الحصول على تقرير طبي قضائي وهذا ما حصل مع احد الطلاب من الخشمان ورفض الدخول لأسباب احراجية اله حكولي الشباب السلطية بالباصات انه الباص عامل حادث قبل يومين وما فيه بريكات والطلاب طالعين بالباص عالواقف بس سؤال هوه اجار الواقف اقل من القاعد وللعلم ابني من السلط ولغاية الجامعة واقف بنص الباص يا بتلحق كرسي لا بدك توقف او بتسجل غياب لأنه ما فيه باص ثاني.

بالنهاية ما اشتكيت لأنه الراح ينحط وينسجن السائق اما صاحب الباصات وإدارة الجامعة رح يمضوا نهاية أسبوع سعيدة.

نسخه الى معالي وزير التعليم العالي

نسخه الى معالي وزير النقل

نسجه الى رئيس الجامعة الهاشمية اذا حاب يقرأ

نسخه للمواطنين الغلابا طلاب الجامعة ابناء السلط المغضوب عليهم بتنقلهم ومعاناتهم

وباليد ولا بالباص مشان النقلة الثانية على السريع