عمون - لما بنسمع كلمة إساءة بييجي في دماغنا على طول العنف الجسدي زي الضرب والإهانة والاعتداء الجنسي! محدش بييجي على باله إن مجرد كلمة ممكن تعتبر إساءة وممكن تؤذي اللي بيسمعها زي الضرب أو الاعتداء، لأن الجرح البدني ممكن يتعافى لكن الجرح النفسي ممكن يفضل ملازم صاحبه! عشان كدة في مصطلح اسمه الإساءة العاطفية واللي ليها نماذج كتير ممكن متخطرش على بالك.

المحتوى نماذج الإساءة العاطفية

Emotional Abuse -1- الإذلال DEGRADATION ودي أشهر الأنواع واللي بتظهر غالبا مع الزملاء، لما يكون فيه زميل بيعاني من أزمة نقص بيتعمد السخرية أو الإسفاف على زميل تاني ليه، فيبدأ يتعامل مع فكرة إهانته على أساس إنها أمر مضحك أو مسلي، سواء لباقي المجموعة من الزملاء أو حتى ناس غريبة عنهم.. وطبعا بتبقى قاسية جدا لو اتعملت بين اتنين المفروض إنهم بيحبوا بعض زي زوج وزوجة، وطرف منهم يتعمد التهكم الجارح مع الطرف التاني، اللي هما المفروض روح واحدة فإزاي روح تنقض على ذاتها وتذل نفسها!!

2- التسلط DOMINATION ودي ساعات بنتخيل إنها حاجة عادية وخصوصا إنها مشهورة أوي بين الأهل وأولادهم.. مفيش إساءة أصعب من فكرة إلغاء كيان الشخص والتحكم في قراراته تحت أي مبرر كان، فالإساءة هنا هي تجريد الإنسان من أبسط حقوقه!

3- اللوم BLAMING بتظهر كتير الطريقة دي في الإساءة بين الشركاء وخصوصا الشركاء عاطفيا زي الأزواج مثلا.. تلاقي زوج بدون أي منطق أو أحقية بيرمي اللوم على زوجته بطريقة مؤلمة وقاسية أو العكس.. ففكرة لوم الآخر بمثابة إدانته بتهمة هو بريء منها، بس لمجرد شعور الشخص بمشكلة معينة جواه.. قرر يحول الآخر لمتهم وكمان يحبسه!

4- الإهمال NEGLECT في ناس كتير بتتخيل إن الإساءة العاطفية إني أواجه حد أو أهينه بطريقة مباشرة، بس الحقيقة إن ساعات التجاهل والإهمال بيكون من أقسى أنواع الإساءات العاطفية وخصوصا لما يكون من شخص بتقدر اهتمامه وحرصه عليك.. تخيل إنك ممكن توجع حد بتحبه أوي وتسيء لذاته من غير ما تهينه أو حتى تؤذيه جسديا، إنما كفاية إنك تتجاهله وتعامله إنه أقل من إنه يكون على بالك..!

5- التورط

الحقيقة إن المصطلح ده مستحدث وخصوصا في علم النفس، فأول واحد قاله هو Salvador Minuchin واللي كان بيقصد بيه تورط الأشخاص في نسيج عائلي بدون أي صورة فردية ليهم، أو بمعنى أصح هو تعامل بعض الأهل أو أولياء الأمور مع أولادهم إنهم يعتبروا extension (استكمال ليهم).. فهنا القضية مش قضية تسلط وإجبار إنما محو كامل لفردية الإنسان.. ساعات بيكون برضه الموضوع ده مع الأزواج في نقطة تعامل الزوج مع زوجته إنها extension أو امتداد منه، وبكدة تبقى محكومة بصفاته وخلفياته الثقافية. في النهاية لو إنت إنسان بتمارس أي نوع من أنواع الإساءات العاطفية لأي شخص ومتخيل إنه موضوع عادي، لا الحقيقة هو أمر مؤلم جدا مش بيدي أي دلالة على قوة شخصيتك أو سيطرة جدية ليك.. إنما هو مؤشر على هشاشتك الداخلية وفشلك في التعامل الناضج مع الآخر، فبتلجأ لأسلوب مبتذل زي تكسيره أو تحطيمه عاطفيا عشان تحس بهيمنة مزيفة وقيمة مش حقيقية لنفسك..

أما لو إنت شخص بيتم ممارسة الإساءات العاطفية تجاهك فيستحسن تتكلم وتعبر عن مدى رفضك للسلوكيات دي، حتى لأضعف الإيمان لو مقدرتش تغيرها بسبب ظروف ما.. على الأقل متحسش كل مرة وإنت بتتعرض للإهانة دي إنك راضي ومستسلم، إنما في احترام لكيانك متمثل في رفض ومقاومة.. لأن فعلا محدش هيحترم إنسانيتك لو مكنتش إنت في الأساس بتسعى ليها.

"dailymedicalinfo"