الاردن دار وفيها كبار
ما بنمشي ونخليها
لما الجد بيوصل حَدْ
بالْأرْواح بنفديها
احنا اولاد الحراثين
فحول الارض بنسقيها
لما المستثمر ينهار
يزُمْ هدومه ويخْلِيها
احنا بنِتمسَكْ بالدار
كبار زغار بنحميها
الاردن ما عنده اسرار
وعالاشهاد بيحكيها
هذي موئل للاحرار
وطول العمر بنبنيها
مش فندق يستقبل زوار
ولما يمِْلْ يخليها
الاردن ما ذلْ وما هانْ
ومن عمان نْدَوِيها
رجالك صيدْ ومش عبيدْ
العز بِيتْحَنْجَلْ فيها
انْ يومْ الضيق بارضكْ حَطْ
رجال السلط بتكفيها
ياما استقبلنا الزوار
بصدر البيت نلفيها
ولما تعزْ الطيبْ يْفِزْ
رجال الهيِّة ترَوّيها
ولما الريح تهب هبوب
اقوى رجال تلاقيها
تشد رجالك بالجنوب
تِثْني الريح وتطويها
ولو بحال عقالكْ مالْ
أوعيْ تهتمي للحالْ
اهلكْ ربعكْ بالشمالْ
تشيل حِمالْ تباريها
.....................
الاردن كانت فلاحينْ
وبدوْ ومحلى ماضيها
شوام وشركسْ مع شيشانْ
وعَرَبْ جْوادْ تحليها
رجالِكْ عبدالله وحسين
هواشمْ تبنيْ تعَليها
اردن حاراتك جنات
ونبع عيونك يرويها
وسهلك اخضر والاشجار
وقصة حب بتحكيها
صيت اولادك فوقك طار
غطي راسك غطيها
.................................
اردن يا أم الابطال
عِدْيْ رجالكْ عديها
وصفي بارضك مش دوار
ومشْ شارعْ مارقْ فيها
وصفي شعله للاحرار
ودَمُْهْ الزيتْ البضويها
قصة مجد وشعلة نار
وللاجيال بنرويها
وصفي شمعة بتضوي الدار
وبنحرق إيد البِطْفِيها
الاردن فِكْر وجنة ونار
بننعم او نشقى فيها
فِكْر ونور وحب وغار
قصة مجد نغنيها
ونار بتحرق هالاشرار
واحنا بننفخ تحتيها
بنحكي حكايات الاحرار
ياما نعيد ونرويها
ولما تجِدْ الكل يسِدْ
ويرخِصْ روحه ويفديها
بنجمع ورد ونجمع غار
ونبني حجار ونعليها
هاي الدار الاغلى دار
الكل بيتغزل فيها
......................
الاردن مشتل للاخيار
ونهر الاردن يسقيها
رجالك نور بتقدح نار
طلت من علاليها
جبال العز الْما تنهار
الكل بيعرف ماضيها
وصفي وحابس صانوا الدار
حسين بعزمه حاميها
كايد شد العزم وثار
يبيع النفس ويفديها
ولما الدار تضيق تحار
يشد الخيل ويرويها
........................
الاردن فيها رموز كبار
ونشميات تربيها
الملك حسين الباني الدار
ولبْنه لبْنه معليها
وعبدالله كمَّلْ باصرار
يشدْ الهمه ويحييها
نلاقي الحيف بحد السيف
والدخيلة بنحميها
النشمي يشُقْ ستار الليل
يِجُوُزْ العتمه ويضويها
والجيش العربي المغوار
يصون الدار يقويها
اردنْ وَسَطْي معْ اصرار
ما يْعَلْي وما يْوَطْيها
يشد خيوطه انْمالَتْ شدْ
ولما تشِدْ يرَخْيها
.....................
اردن يا احلى الاوطان
بتطلب روح بنعطيها
ولما الليل يخاوي الليل
نار رجالك تضْوِيها
انْكتْبَتْ عَرْجالِكْ خطْواتْ
خطوة خطوة بنمشيها
بنوكل خبيزة و مُرار
وراسك تبقى بعاليها
ولو خُيرْنا ما بنختار
إلا الاردن واهليها
وعيني لو تغفل عدْار
بقلع عيني وبرميها
..........................
احنا رضعنا واحنا زغار
غير الاردن ما في دار
شربنا من ضرعك اصرار
ما نخون وما نْخَلْيها
قالت امي واحنا زغار:
البشرب مية من البيار
ما برمي حجارة فيها
وِلْبُوكِلْ خبز وملح بدار
ما يخون ويغدر فيها