شو أخبار البندوره وشو اخبارك يا الخيار
وكيف الحالة مستوره جاوب يا عبد الستار

يا امينه الحزينه سكرت الخزينه
قريه وبدو ومدينه طلعت للسما الأسعار

عودة الله تخرج بعرف وشو بدك تتصرف
من سنتين وما توظف وفي الشوارع فرجه صار

واللحمه والأواعي اصبح مالهمش داعي
والجرايد بتراعي بدها تخلي الليل نهار

ومن العقبه للسلط سكري وقلب وضغط
ولع برميل النفط وصفرنا بالخمس اصفار

اوووف اوووف اوووف

ميلي في خصرك ميلي طارو النواب
والقصة شو طويله داخو الشباب

عليّ صوتك مش سامع يا ابو حمدان
صوتك يا حسرة ضايع في البرلمان
جمعيات وجماعة واخوة واخوان
ويا نزلة وادي موسى هور قلاب

والقصة طرمه بتعرف بنزين وكاز
واللي قاعد بتلفسف وضعو ممتاز
كرشو مترين وبسحب بنزين وغاز
ولو صحلو بيعملنا شقف وكباب

طالع نازل بنظر كل شي بقول
تنمية مع بطاطا ومرأة وفطبول
شوتاته بره وعمره ما سجل جوول
وقاعد بلعب لحاله زين الشباب



تلفزيون وجرايد وانتخابات
وفن وزن وقصايد واجتماعات
تقاليد وعوايد والنقابات
بتلعب في الوقت الزايد بدل الأحزاب

واسرح وامرح في الغابه على الجاجات
واتمردغ فيها يابو الحصينيات
شفافية ورقابه وشفطوا اللبنات
وصحفي حامل ربابه وقاعد ع الباب

والعله مش بالقلّه الفقر مش عيب
لا تقلي الشعب معود ع كلمة عيب
ياللي بتعيب فينا بتعلم بالغيب
احنا الله حامينا وهو الوهاب


سلطه جنب طحينيه والحمص حب
ومنسف جنب ملوخيه يشبع هالشعب
والوحده الوطنيه نعمه من الرب
الأردن بلد الحريه ومن سبع ابواب

شاعر وكاتب أردني
Mhd_s2003@yahoo.com