عمون - تعتزم الحملة الوطنية من أجل حقوق الطلبة تنفيذ اعتصام غدا أمام وزارة التعليم العالي لإنصاف طلبة مواليد الـ2000 والتي قالت إنهم يتعرضون للظلم بعد ظهور نتائج الثانوية للعام الحالي إذ أن فرصتهم بالتنافس اصبحت أكثر ضآلة مع طلبة العام الحالي.

وتاليا نص منشور الحملة:

بكرة في اعتصام منظميته الحملة الوطنية من أجل حقوق الطلبة - ذبحتونا وطلبة مواليد الـ2000 ، تحت شعار "ظلمتونا" ..
مواليد الـ2000 ضحية تخبيصات وزارة التربية في ملف التوجيهي، ومشكلتهم بتلخص مأساة نتائج هاي السنة ..
جزء كبير من هؤلاء الطلبة جاب السنة الماضية معدلات أقل بأعشار من معدل القبول للتخصص الللي بدهم إياه أو البرنامج التنافسي (مثلاً طالب حصل على 94.5% وطلعله صيدلة موازي، وهو بده يحول تنافس، فبيضطر يعيد مادة أو مادتين عشان يرفع معدله ويدخل تنافس ويوفر على اهله مصاريف فوق قدرتهم المادية) .. وفي جزء آخر اضطر يعيد السنة كاملة لأنه أهله مش بقدرتهم يدفعوا موازي، فاضطر يعيد السنة عشان يرفع معدله بنسبة وينقبل بالتخصص اللي بده إياه على التنافس.

الكارثة إنه لما طلعت النتائج، وشفنا كيف النسب مرتفعة جدا جدا، هذول الطلبة، صار من المستحيل يقدروا ينافسوا طلبة السنة الحالية، بحكم المعدلات ا لمرتفعة لطلبة السنة الحالية.

يعني كيف ممكن ينافسوا وهو اللي جايبين فوق ال99% هاي السنة 300 طالب؟!!!
اعتصام بكرة عشان ننصف طلبة التوجيهي السنة الماضية (مواليد ال2000) ويتنافسوا لحالهم مش مع طلبة السنة الحالية، وهذا أقل حق من حقوقهم.

كونوا معنا بكرة من الساعة 10 ونص ولغاية الساعة 3 العصر أمام وزارة التعليم العالي.