كانت المحبة تجمعنا دون ان يفرقنا مذهب او دين . والآن اصبح اختلاف الاجتهاد نحله بالسيف والمتفجرات.

كان همنا واحد اكله هنيه وتعليله بألمساويه وبالكتير مسلسل لغوار او ابو عواد . والآن كل واحد مسكر بابه وما بيعرف شو باكل جاره واذا عنده الي ياكله . وصارت مسلسلاتنا قتل ودم واخبارنا حروب ومجازر .

صارت زياراتنا لبعض عشان نقول لبعض عظم الله اجركم وحتى هذه دخلوا عليها الحرام والحلال . كنا نعرف كل بيوت الحاره ومين ساكن فيها واسماء كل الي فيها والآن ما بنعرف اسم الي ساكن فوقنا ولا الي ساكن تحتنا واذا شفناه على الدرج ما بنقله صباح الخير ولا مساء الخير . الاخ ما عاد يزور اخوه ولا يعزم اخته لا برمضان ولا بغير رمضان ويا دوب على العيد واتس اب او مسج فويس وكل عام وانتم بخير .

بنصور اكلاتنا وبننشرها على الفيسبوك وغيرنا بيلم اكلاته من حاوية النفايات . وبتروح على الجامع بتلاقيه مليان والسني بيسب الشيعي والشيعي بيسب السني والاثنين بيسبوا كل الباقين .

والمسيحي في كنيسته عم يحكي عن الاثنين .كنا نحكي حكايا القريه والحاره ومين اتزوج ومين طلق ومين زار مين ومين عزم مين صرنا بنحكي بالدين وهذا كافر لا يجوز السلام عليه وهذا خارج عن المله يحق قتله وقطع رقبته .

زاد حكينا عن الدين وكترت جرائمنا باسم الدين . زاد الرزق عند بعض الناس ولكن راحت البركه . وزاد الفقر عند بعض الناس ولكن انحرموا العونه .

ليش هيك كنا وليش هيك صرنا ، لأنه كنا ابناء حاره ووطن واصبحنا ابناء مدن ونبحث عن وطن