لم يغب الملك عن القمة العربية ، في الدوحة ، وامير قطر وكبار المسؤولين القطريين ، كانوا في الاردن ، قبل ايام ، وشاركوا في المنتدى الاقتصادي العالمي ، والعلاقات الاردنية القطرية خرجت من عنق الزجاجة ، كما كنا نفترض ، لكن اوضاع الاردنيين في قطر لا تسر احدا ، ونريد من الدولة التدخل لاجل هؤلاء وحياتهم ، لدى القيادة القطرية ، خصوصا ، مع اقالة مئات المعلمين الاردنيين مؤخرا.

لدي رسالة من مواطن اردني في قطر انقل بعض ما فيها ، واعذروني حين انقلها بالعامية ويقول المواطن شارحا ما جرى بشأن اقالة مئات المعلمين يوم الاربعاء الماضي ، اي قبل يومين ، ويشرح القصة بالعامية من فرط الانفعال ، لا النقص في اللغة. ويقول: (والله مبارح كان يوم عصيب جدا على كل الاردنيين العاملين في مهنة التدريس وفي وزارة التربية في قطر ، والله ما ضل حده الا تفنش كلنا تفنشنا والحجة الغاء الوزارة وتحويلها الى مجلس اعلى وتحويل المدارس الحكومية الى مستقله والمصيبة انه المدارس المستقله بدها نقل كفالة مع انها تابعة للمجلس الاعلى اللي هوه صارت الوزارة تابعه اله ، واتحداك اذا في اردني تمت نقل كفاله اله ، اي اردني بده ينقل كفاله يبعد فورا والله انه في اردنية جابت ولد لما ابوه راح يعمل اوراقه الثبوتية ابعد المولود بحجة انه اردني،،، انا بدي اسأل وين السفارة الاردنية؟؟ هل العلاقات سيئة لهذه الدرجة ، والاردني ذنبه "جواز سفره" طبعا صار المصري نفس الاشي ولكن المصريين مش مغضوب عليهم زينا لا احنا مقبولين هون وازا رجعنا عالاردن رح نتعب ، ولا قطر راضيه فينا مع انه المعلميين الاردنيين اكفأ معلمين وازا رجعنا عالاردن بدنا نصف في طابور اله اول وما اله آخر واحنا رح نصف بالاخر ، لانه ما في واسطة "طبعا" رب العالمين "اكبر واسطة" واكثر من 800 اسم اقيلوا الاربعاء ، اسر بأكملها رح ترجع وللاسف اعمارهم صغيره اللي تفنشوا لسه شباب والصراحه هون في فلوس يعني ممكن يوصل دخل الاستاذ لـ 2000 دينار بالشهر غير السكن. ارجوكم شوفولنا حل يا سيدي ما بدنا نرجع عالوزاره بس اقل شيء يسمحولنا بنقل الكفاله زينا زي الامريكي اللي بياخد 40 الف ريال وبسكن فيلات مفروشة وسيارات وتذاكر ببلاش وهوه على حفة قبره يا سيدي بلاش الامريكي خلينا ، زي الهندي اللي بتنقل زي العصفور من شغل لشغل ، خلونا زي اللبناني اللي ماكل الدنيا يا ناس ساعدونا الشغل موجود بس احنا بدنا ننقل كفالاتنا اي واحد بنقل كفالته بتسفر احنا شو ذنبنا شو هالذنب اللي عملته الاردن عشان هيك معاملة ، ليش الاردني محارب دايما؟؟ ارجوكم اعملوا اتصالاتكم وشوفوا الوضع كم هو سيئ واثيروا الموضوع والله سمعت على لسان قطري بالحرف قال "ولا اردني رح يضل" ليش مابنعرف حتى مدراء المدارس المستقله بحكوا احنا بدنا اياكم ولكن انقل اقامتك وطبعا معروفه النتيجه ، وهاد معناه ابعاد فوري النا ما في حده بواجه اي مشكله الا الاردني ، بترجاكم تحركوا علشان هاي الاسر ما تتشرد اكتر علما انه عدد المدرسين الاردنيين في المدارس المستقله 74 مدرس فقط ، وجميعهم موجود في المدارس الحكومية ، واللي بحكيلكم انو في 30 الف اردني في قطر غير صادق ، فقد صرنا اقلية ، ويتناقص عددنا يوما بعد يوم).

ملف الاردنيين في قطر بحاجة الى حل والى فك عقده بشأن التوظيف والوظائف والتأشيرات الجديدة ونقل الكفالات ، ولا نظن ان هناك سببا مقنعا ان نرى هذا المشاهد السلبية بيننا وبين الاخوة القطريين ، الذين نأمل منهم التوقف قليلا كذلك عند ملف العلاقات مع الاردن.

m.tair@addustour.com.jo