رجع عمار من شغله تعبان
قالت تهاني: احطلك تاكل؟
لا ما الي نفس مش عارف شو مالي , تعبان و بردان , بدي اطلع انام شوي
خافت تهاني, مش طبيعة عمار
تهاني يا تهاني تعالي , اظن عندي حراره
بالفعل عمار بغلي غلي
جابت بندول وماء
تهاني , تهاني, بردان تعالي اكمريني خليني اعرق احسن , جيبي الحرامات اللي في الخزانه و ادمليني
اكملت تهاني يومها كالمعتاد , البيت, الطبيخ..........
حضر الاولاد من المدرسة , فقالت: ابوكم مريض ما حد يزعجه
يلا كلوا و غيروا وابدوا ادرسوا هيني جاي
راحت تهاني تطمن على عمار لقته نايم
يلا
تهاني عم تدرس عصام و في عز التركيز.............تهاني , تهاني
يلا انا جاي
عمار: تهاني لما بناديكي تعالي بسرعة ما في حيل انا كتير تعبان
جيبيلي قربة سخنه وفازلين و بدي كاسة شاي
قدمت تهاني المطلوب و حاولت استكمال التدريس
تهاني , تهاني بدي زنجبيل مع الشاي و شرحتين ليمون
دورت ام بخت على زنجبيل ما لقت وضريت على حارس العمارة وطلبت منه يجيب و حاولت مرة اخرى استكمال التدريس
تهاني, تهاني وين الزنجبيل ؟ شو بتزرعي فيه؟
ضربت المسخوطة على الحارس تستفسر , فقال ما في يا ام عصام
تهاني: طيب روح شوف عند الخضرجي التاني
و استكملت او حاولت تهاني
ضرب التلفون مرة اخرى: يا ام عصام ما عندهم , اجيب زنجبيل باودر؟
اوك وشكرا غلبتك
و حاولت محروستنا استكمال مهامها جاهدة لتحافظ على ابتسامة امام الاولاد
تهاني , يا تهاني وين الزنجبيل ؟
ما في رح اجبلك باودر بعتت الحارس يجيب
لا ما بدي الباودر بعملي حرقة في معدتي واتا هلا معدتي حساسه
شو الطبيخ اليوم ؟
مقلوبه
صعب ابلعها
اعمليلي اشي اقدر ازلطه زلط , حلقي بو جعني
بدي بامية
بس اتا غملت مقاوبة
فحضرت تهاني مقلوبة و بامية
ماما: بدي تساعديني أسمع عر بي
يلا بس أخلص مع عصام
تهاني، يا تهاني ...........
وتهاني هون وتهاني هناك
ماما: ما هو المورستان
المورستان يا لولو هو مجموعة عاقلين مهسترين زيي بيتنا اليوم
وكتبت لولو على الدفتر : المورستان هو بيتنا اليوم
هذا هو يوم تهاني بالفعل
في اليوم التالي : كيفك حبيبي؟ إن شاء الله أحسن ؟ شو رائيك تقوم تتحمم و تتكرفت، اصدي تروح على الشغل
عمار: قررت أخد اجازة اليوم كمان ، بلاش انعكس
وطبعا كان يوم من الأخر .........لدرجة تهاني كرهت اسمها
وفي اليوم الثالث قرر عصام يتسهل
ودعته تهاني
اغلقت الباب ، ثم اغلقت عينيهاو تنفست نفس عميق و باشرت بزفير ولكن....
عصام: ماما
ما بدي أروح عالمدرسة اليوم ، حلقي بوجعني.
(ملاحظة : المقال مكتوب باللغة المحكية).