قد يبدو هذا السؤال كبيراً ..بس ؛ في الحقيقة هو أصغر مما تتصوّر ..وهناك عدّة طرق للتأكّد من نجاح القمّة من عدمها ..!! وإذا أردتَ أن تعرف ذلك بنفسك فلن أبخل عليك بما أُوتيتُ من علم :-توجّهْ حبيبي فوراً إلى الصيدلية ..ادفشْ الباب برجلك اليسرى ..لا تأخذ نفساً ..خلّي عرقك ينقِّطْ ..اطلب من الصيدلاني ميزان حرارة ..افتحه ..لا تدفع ثمنه ..اضرب الصيدلاني ( كف مْطَنْطَنْ ) ..حتى يصرخ فيك..وعندما يفتح فمه عَ الآخر ..ارفع ميزان الحرارة ..لا تضعه بفمه ؛ إيّاك ..ضع اصبعك ..رح يقرقط فيه ..الآن ستصرخ أنت ؛ ضع الميزان في فمك أنت ..حرارتك أنت ..همك أنت ..وجعك أنت ..كم تتوقع درجة حرارتك ؟؟؟.
الطريقة سخيفة ولا تدل على القمّة ..صح ..؟؟ وأنا معك ..بس عدّيها هالمرّة ..لأنو الصيدلاني مش شد إيدك..لأنو شد أصبعك..!! وفي القمّة كانوا ؛ كل واحد حاط أصبعو بفم الآخر و ناقصهم ميزان الحرارة ..بس و الشهادة لله ..ما حدا صرخ ولا جظّ..!!
خذلك هالطريقة الثانية ..شفت ميزان الحرارة الأول ..؟؟ أيوة هوّ هوّ ...واطلع من الصيدلية ..خذ تراكتور أُجرة ؛ مش تاكسي ..وقول للشوفير : وصلني أقرب مطار ..طبعاً ..طول الطريق خلي معك كيس ( بزر ) كبير ..ظلّك بزِّرْ ..بس اوعى توكل اللب ..اللب مش إلنا يا مسخمط ..اكتفي بالقشر ..واللب على طول إيدك ارميه ..طول الطريق هيك ..قشِّرْ وكُلْ القشر وارمي اللب ..وأوعى تعزم على شوفير التراكتور ؛ ترى تخرب الخطّة ..!!
المهم ..الآن أنت وصلتَ المطار ..أوعى تروح على مكان الطيّارات ..أصلاً ما رح يدخلوك ..روح على قاعة المغادرين ..سلِّم عليهم وبوِّسْهم و فرجيهم ميزان الحرارة واسألهم إذا حدا فيهم يعرف شو هاظ ..؟؟ طبعاً الغالبية رح تعرف ..اتركهم بدون سلام وكلام وكشِّرْ قد ما تقدر..و روح على قاعة القادمين ..اشلح كندرتك وخبيها في الحمامات ..واطلب من الجميع بعد السلام و البوس إنهم يدوروا على كندرتك باستثناء الحمامات ..طبعاً رح يلحقوك و يشتموك و يتهموك بالهبل و الجنون ..وهو المطلوب ..!!
عزيزي القارئ ..قد تبدو أفكاري غير مترابطة ..وقد أبدو ملخوماً في طرح ما أريد ..وما طلبته منك كان عبارة عن تصرّفات مريضة لواحد مش عارف إيش يعمل ..بس لديه اعتقاد بأنه يملأ الدنيا حركة و ضجيجاً دون فائدة ..!! هذه هي القمّة ..حركات قرعة ..ميزان حرارة بدون هدف ..وضرب للصيدلاني دون مبرر ..وعبث مقصود ..ووصول بطيء بالتراكتور ..وأكل للقشر و رمي للب ( لب الموضوع ) ..وذهاب للمطار ..وتخويث متقن على المغادرين ..وكندرة في حمامات ..وقادمون يتهمونك بكل شيء ..!!! هل القمّة تنجح بغير ذلك ..؟؟؟