لفتني جدا حجم السخرية والرسائل العميقة التي قرأتها عبر صفحة "الفيسبوك" لإحدى الطالبات المتوقع تخرجها من جامعة البلقاء التطبيقية.

وما ان انتبهت لاسم تلك الفتاة حتى شعرت بالفخر حقا، فالطالبة الأخت هي ذاتها التي ما ان طلبتها أي شيء "رمقتني نظرة غضب" ثم قالت " أنس حل عني عندي دراسة .. فأنا كسول جدا "على حد قول مقربين"..

نعم هي أختي العزيزة "آية" حفظها الله ورعاها، فبعد أن حمدت الله وصلّت على رسوله الكريم صلواة الله والسلام عليه، كتبت بنكهة الفرح وبلهجة "سلطعمانية" كلمات عبرت خلالها عن تحديات يعانيها معظم الطلبة في الأردن خصوصا ممن هم من فئة الفتيات ..

تقول آية معلقة على صورة وضع عليها اسمها من الطلبة المتوقع تخرجهم :

"رسمياً وعالمياً وعربياً واردنياً وسلطياً (متوقع تخرجه)، بداية رجاءً محدّش يقولي "عقبال الشهادة الكبيرة" لانه هالكلمة متوارثة اباً عن جد واحنا مش داريين شو هي الشهادة الكبيرة، فبلاش تطلع شهادة وفاة فـفكّوني منها بليز! 　

تخرجت إلها معنى كبير عندي، غير انه تقدمت علمياً وثقافياً، معناها انه فش صحوة بدري وفش منبهات من الأربعة ونص ومن الخمسة ومن السته الا ربع ومن السته مشان اطلع من البيت قبل بساعتين ألحق اي مُحاضرة بالكوكب!
معناها انه فش سَرَحان وهذيان كل يوم لمدة اقلها نص ساعة قُدام الخزانة مشان اعرف شو بدّي ألبس! ، معناها فش توتر ولعب بالأعصاب وانا بستنّى علاماتي تنزل وفش اشي اسمه "امتحانات" وقلق!
معناها ما رح أظل اطلّع على مُعدلي نزل، طلع، ارتفع، زاد، نقص وكأني حاطة مليون الف دينار بالبورصة وبراقب على اعصابي!
معناها فش دُكتور -مع الاحترام الكبير للكل- رح يقولي عليكِ بريزنتيشن او راجعيني ع المكتب او غياباتك كثيرة او رح احرمك او انجحر مشان ضحكت مع صاحبتي!
معناها فش اي كنترول باص رح يآكل راسي و يقولي "جامئا سويلح سبيه" او انّي انلطع سنة وانا بستنى بالباص أو تركب وحدة جمبي زيادة واندحش!
معناها فش نفترة (عبدالرزاق) وهو بقولي راجعيني مشان افتحلك شُعبة!
معناها فش جملة "لا يمكنك الدخول لانه وضعك الاكاديمي غير معرف"!
معناها فش جملة "المبلغ المطلوب للمالية : 670 دينار"!
معناها انه إل أكم (موَجْهَنة) الّي عرفتهم بالجامعة رح ابطل اشوف صباحهم وارتاح!
معناها فش مُجاملات ونفاق اجتماعي وشذب وهز ذنب وظحك ع اللحى وبروتوكولات سخيفة!
معناها مش رح اسمع جملة "روحي ادرسي"　
معناها فش رُكبة مع (أبو دحّام) بالباص وانا خايفة من سواقته "الصاروخية" ولا رح انطرش بأغنيته المفضلة "ابتلينا بدنيا غبرة وبخت مايل" الي نص شوفيرية الباصات مبتليين فيها!
معناها مش رح اسمع خاوة عني لـ دعايات (الراديو) مثل "يا سلام ما بدها كلام احجزها أوام مع .....
ولا رح اسمع كل خميس "صهلل صهلل صهللالا صهلل مع راديو هلا مع برنامج الوكيل ويلي محلا الصهلالا"...
( تلحنوش سامعة! ) ..

ولا رح اسمع " هي الكتاب بـ مكتبة الغفران، اليقين، بوك شوب التخطيط" وادفع ليرااااات تقول قسط سيارة!

يعـني باختصار راحة نفسية وجسدية ومعنوية وعديـنا يا شوق عدينا..　
وأخيراً بحب اشكر من كُل قلبي شاورما الـ آني واي و نيسكافيه التخطيط الّي كانوا من الاسباب الرئيسية اني اصبر على الجامعة، كل الحُب والشكر! "

انتهى ..

بصراحة جميع التحديات التي ذكرتها "أختي المحروسة" من ناحية طول المسافة وازمة المواصلات ومشاكل الطلبة في الجامعات الأردنية من النواحي المادية والتحصيل العلمي وصعوبة المنهاج وتعامل الطلبة مع بعضهم وتعامل الأساتذة مع الطلبة.. ومشكلات الراديو واعلاناته .. كل هذا الشيء مقبول ولها الحق في نقده بالطريقة التي ترغب .

أما انها تشكر محل شاورما وكشك النسكافيه لأنهم صبّروها عالجامعة هاي اللي مش قادر أستوعبها !!

ما علينا ,,

الآن وبما أن الجامعات تنشر أسماء الطلبة المتوقع تخرجهم، هل يا ترى سياتي يوم ونقرأ فيه أسماء الشباب المتوقع توظفهم ... أم سيجد الخريج لنفسه مكانا آخر كمحل الشاورما وكشك النسكافيه لتصبير نفسه على البطالة ..

على كل حال ... مبارك يختي