قال القذافي في لقاء الجزيرة أن الحكام العرب مساكين ..!! ضحكت ..ضحكت ..وكمان ضحكت ..و طاحونتي السوداء والمسوسة في آخر مغارة فمي صارت واضحة لمن أراد أن يرى سوادي الدائم ..!! والآن عندما أحدثكم عن الحكام العرب المساكين ..فبالتأكيد لا أقصدهم كلهم ..بل من يعرف نفسه منهم ..!! الحكام مساكين ..؟؟؟؟؟ .. حسناً حسناً ..هم مساكين ..ونحن المحكومين ما نكون..؟ أكيد إحنا إللي مخربين الدنيا ..إحنا سبب البلاوي ..إحنا إللي ماكلين الوطن العربي من محيطه إلى قحيطه .. !! هم مساكين ..دموعهم على خدهم ..كل يوم يقدموا عرائض إلى دائرة الأحوال و ديوان المظالم و يقفون على طوابير توزيع الفول و العدس ..وينتظرون من يتصدّق عليهم بخمس حبّات تمر ..!! ونحن ..إحنا ؛ آه منّا إحنا ..إحنا إللي مانعين عنهم الحل ( السلمي و الحربي ) ..إحنا إللي خاذلينهم بكل المواقف ..إحنا إللي كل ما يساووا شغلة ؛ نقوم ونحط فيها مليون عيب وعيب ..!! إحنا إللي كل ما ينادونا ؛ ما يلقونا ..!!
الحكام مساكين ...فعلاً مساكين ..لأنهم يسوسون هكذا شعوب ..لو حدا غيرهم ما يرضوا ..بس كويّس إنهم راضيين فينا ..أشكرك يا رب على نعمة الحكام المساكين ..أحمدك لأنك لم ترسل حاكماً يقاسمنا رغيف الخبز ..ولا يشترك معنا بالفقر ..!! شوفوا الحكّام ما ألطفهم ..حتى الفقر تركوه لنا ولم يقتربوا منه ..وما قاسمونا هالنعمة ..!! ألم يسمحوا لنا أن نمرض ..؟؟ سمحوا والله سمحوا ..هذه نعمة وإلاّ لأ ؟؟ ألم يتساهلوا في شرط الموت ..فسمحوا لنا بأن نموت وقتما نشاء ..؟؟ سمحوا والله سمحوا ..!! ألم يتركونا نسب و نشتم أمريكا أمام المرآة ..؟؟ ألم يتغاضوا عن ألوان ملابسنا الداخلية ولم يتدخلوا في ( إسْلِبِّها و شورتها ) ..؟؟ ألم يسمحوا لنا بالتبحلق في فضائية روتانا و ميلودي ..؟؟ يا الله قديش إحنا ظالمين ..!! إحنا أكّالين و نكّارين ..!! فيه حدا عندو حكّام مساكين مثل هيك و ما يحمد الله ..!!؟؟
لسنا بحاجة إلى القذافي لكي يؤكِّد لنا ( مسكنة ) الزعماء ..وما أهمية كلام القذافي إلاّ من باب أنه ( زميل ) فقط لا غير ..!! فنحن الشعوب ؛ اكتشفنا نعمة ( مسكنتهم ) منذ الفطام ..لذا ..إحنا العرب أمّة أخلاق ..وعمرنا ما تحركشنا في مسكين ..عشان هيك ..إحنا ما بنتحركش فيهم ..عمركو شفتوا قوي يتحركش في مسكين ..شو بقولوا عنّا الناس ..يا فضيحتنا عند عرب الشيخ بلير..!!
هم مساكين ؛ وتجوز عليهم الصدقة..فأخذوها كاملة و كانوا يخربطون في العد دائماً..لذا ..لم يفعلوا شيئاً المساكين سوى إنهم كانوا يبدأون العدّ من جديد ..!!