نامي يا بابا نامي..وأنا أحميكِ من الحرامي ...!! بكرة يا بابا القمّة..بكرة بيجتمعوا ..عارفة يا بابا شو معنى قمّة و شو معنى يجتمعوا ..!! القمة إشي زاكي ؛ زاكي كثير ..أزكى من الشيبس و البوظة ..حتى أزكى من ( الكوكو ) إللي دايماً تطلبيها منّي ..!! القمّة يا بابا ؛ إشي أكبر من دارنا ؛ قد دارنا ودار جدّو ودار عمّو ودار جيرانا إللي هون و جيرانا إللي هناك ..وجيرانا إللي فوق وإللي تحت ..ولسّة أكبر كمان يا بابا ..!! عارفة ليش القمة كبيرة هالقد يا بابا ..عشان الناس إللي بدهم يقعدوا فيها ناس كبار كثير كثير ..أكبر من الشرطي إللي دايماً تأشريلي عليه .. وأكبر من إللي ضرب الزلمة بالعصاية في التلفزيون هاظاك الدور ..!! طيب ..نامي يا بابا نامي ..وأنا أحميك من الحرامي ..بس نامي ؛ مشان الله نامي ..بكرة القمة يا بابا ؛ ولازم تنامي ..لازم ..!!
سألتيني عن ( يجتمعوا ) ..يجتمعوا يا بابا ؛ يعني..كيف لمّا ييجي عندنا ضيوف كثار يوم العيد ..زي هيك يا بابا ..بروحوا على البيت إللي أكبر من بيتنا وبيت جدو وبيت عمو وبيت الجيران ..وبيقعدوا هناك يا بابا ..بحطوا قدّامهم عصير ؛ بس مش عصير ( أبو الشلن )..يجوز بـِ ( ثلاث إشلون ) أو أربعة ..!! وبحطوا قدامهم كمان بسكويت ( مدوّر و مربّع ) زغير كثير ؛ إشي عليه إشي أبيض و إشي عليه إشي زي الشوكلاتة ..وإشي محطوط بصحون زغيرة ..شُفتي صحون فناجين القهوة إللي عندنا ..أيوة أيوة ( المخشرفات عَ الداير ) ..زيهن بس مش مخشرفات ومش للقهوة ؛ للـ ( بيتي فور ) وهاظ بعدين أحكيلك عنو ..!! وبكون قدامهم كمان ( قزازة مَيّة ) هي نفس اللي عندنا ؛ بس بتختلف إنو ( القزايز ) إللي عندهم فيها مَيّة وإللي عندنا فاضية ..!! و شُفتي بكايتات الفاين ؛ هُما زينا بحطوا قدامهم ..بس بسموها ( ورق كلينكس ) ..إحنا نستخدم الفاين للمناخير ..همّا بيستخدموه للفم ..حتى يطلع الحكي أبيض أبيض ..!! إحنا الفاين بيجرح مناخيرنا لأنو مصنوع من بلاستيك ..وهُمّا بزيد شفايفهم نعومة ..وبيحكوا حكي ناعم و بجنن يا بابا..!!
نامي يا بابا نامي ..وأنا أحميك من الحرامي ..!! يا بابا إذا بتحبيني نامي ..بكرة القمة ..وهاي أوّل قمة رح تشوفيها ..نامي ..ما بدّي إيّاك تشوفيها ..نامي ..!! إيش إيش إيش..؟؟؟؟ ..بدك تعرفي ليش مجتمعين ...آآآآآآآآآآآآآه ..هاظ إللي كنت خايف منّو ..!! شوفي يا بابا ..من يوم كنت قدِّكْ زغير ؛ لحد هسّة وأنا أشوفهم دايماً يجتمعوا ..ومش عارف ليش ...؟؟ مشان الله نامي يا بابا ..واكبري بسرعة وقوليلي : ليش هُمّا مجتمعين ..عسى ما شرّ ..؟؟؟ بس هسّة نامي يا بابا نامي ...!!!