عمون - وجه الزميل محمد عمر سؤالاً الى وزير السياحة نايف الفايز، تالياً نصه :

سؤال موجه من المواطن الأردني محمد عمر إلى معالي وزير السياحة الأردني المحترم.

معالي الوزير اين الجناح الأردني في القرية العالمية في دبي؟؟ انا كمواطن أردني، وجود الجناح الأردني في القرية العالمية يعنيني كثيرا أكثر من مجرد تبضع اجبان والبان وكنافة اردنية.

معاليك القرية العالمية بزورها اكثر من 6 مليون زائر في الموسم !! عارف شو يعني 6 مليون ومن كل جنسيات الأرض .. معناها انه هذا افضل ترويج لأي بلد في العالم انه 6 مليون زائر يشوفوا علم الأردن او يسمعوا عن بلد اسمه الأردن او يجربوا منتجات اردنية وتعجبهم.

معاليك مش معقول تكون دول عمرنا ما سمعنا فيها الها اجنحة في القرية العالمية وتكون سوريا وفلسطين ولبنان اجنحتهم جنب بعض والالاف واقفين على الأبواب بيحضروا رقصاتهم الفلكلورية وبيسمعوا اغانيهم وإحنا ما النا جناح.

معاليك وين جناحنا . هل فعلاً جناحنا مكسور حتى في القرية العالمية؟