مش عارف إيش أحكي..النواب خزقوا طاقيّة مُخّي ..ومش بس هيك ؛ شويّة العقل إللي ماسكاتني و إمشياتني يبدو إنو النوّاب مستهدفينها وبدهم يطيروهن منّي ..!! مش الجماعة كانوا مع الحبس ..طيّب ؛ شو إللي خلاّهم فجأة و بدون مُقدمات وإنهم ( طُبْ طاخ ) مغيرين رايهم وشاطبين عقوبة الحبس عن الصحفيين المسخمطين ..؟؟معقول خافوا ..؟؟ لا لا ما أظن ..هاظول نوّاب و جاي يا هالناس جاي و ما بخافوا ..وبالعكس بخوفوا بلد ..!! طيّب ..ممكن يكونوا استخطوا حالهم ..؟؟ لا والله ما أظن إللي يستخطي حالو يبيّن على شكلو ؛ وشكلهم لم يكن يطلب المغفرة ..!! طيّب ليش ..؟؟ يمكن إنعمللهم عمل ..؟؟ عمل إيش يا عليش ..هاظول ما يقطع فيهم سبعين ألف عمل ..؟؟ طيب ؛ ممكن يكون حدا بنُص الليل حكى معهم حكي ناشف وقاللهم : عدّوها خليها تعدّي معكو على خير ..؟؟ فيه منّو ..بس ما أعتقد هذا السبب لأنو بالليل وبالنهار غالبية النوّاب يكونوا فاصلين تلفوناتهم الخلويّة والحكي على ذمّة الشعب الأردني كلّو ..!!
أي والله شغلة تحط العقل بالكف ..!! معقول النواب إللي مرمطونا هالمرمطة ؛ فجأة يصيروا حنونين وخايفين على الصحفيين ..؟؟ يا عمّي فيه حاجة غلط ..فيه شغلة أنا مش فاهمها ..ولازم أفهمها ..معقول إللي صار معقول ..؟؟!!
أيوة أيوة..استنوا ؛ أيوة ..تذكرت شغلة ..ممكن النوّاب يكونوا صوتوا بالغلط ..يعني لما أجوا يصوتوا سمعوا بالعكس وفكّروا إنهم صوتوا على حبس الصحفيين ..؟؟ شوفوا ما أهبلني ..قال صوتوا بالغلط ..وهُمّا متى صوتوا صح ..؟؟ حتى لمّا صوتوا آخر مرّة على عدم الحبس ؛ كان تصويتهم غلط بغلط ..!! بس أموت وأعرف ليش قلبوا هالقلبة ..؟؟
شو رأيكو ناخذ فاصل قصير استراحة وبعديها نرجع نكمّل حكينا عن النوّاب ..؟؟ ماشي ماشي ..الفاصل سيكون نكتة قديمة و سمجة وبايخة ..ليش أنا اخترتها ما بعرف يجوز بتنفع في يوم من الأيّام إذا ما نفعت هسّة ..!! تقول النكتة : سألوا جحا : كم عمرك ؟؟ فقال : ثلاثين سنة ...وبعد ست سبع سنين سألوه : كم عمرك ؟؟ فقال : ثلاثين سنة ..فقالوا له : قبل أكمّن سنة سألناك وقلت ثلاثين ..وهسّة بتقول ثلاثين ..وبعدين معك ..؟؟ فقال جحا : أنا زَلَمة وعند كلمتي وما بغيّرها ولو على قطع رقبتي...!! ها ها ها ها ...انتهت النكتة للي حاب يضحك ..وانتهى الفاصل ..وانتهى المقال أيضاً ..!!!
وكيف وأنا أضحك عليكو وما كان فيه تكملة بعد الفاصل ..هُمّا النواب أحسن منّي ...؟؟؟!!!