مش عارف ؛ الثلجة الأخيرة خلّتني أخرج عن طوري قليلاً ؛ يجوز لأني إنحرمت منها و أنا إللي كنت بأستنى فيها على نار ( شوفوا قال : استنى بالثلج على نار ) ..!! المهم ..ما إن لمحتُ فارسة العرب وحامية حمى الطرب نانسي بنت عجرمكو تطلّ علينا وسط الثلج ؛ حتى ذاب ثلج روحي و أحسستُ بشبع رغم جوعي المُزْمن ..وتسلل الدفء إلى مفاصلي رغم الصقيع الذي يلفّني ..!!
نانسي تصنع الدفء وهي باردة ..الثلج بارد ومع ذلك يخلّيك تفرِّك بحالك وتصنع الدفء ..!! نانسي إذا أجت على أي محطّة تخليك تقعد بالبيت أو إتكربِسْ محلّكْ..وكذلك هو الثلج ؛ يخلّيك ما تطلع من الدار ..!! نانسي في أي شارع تمشي فيه يتعطَّل السير و تُعاق الحركة والكل بدّو يشوفها ..و برضو الثلج يسكِّر الطُّرُق ويعطِّل الحياة العامة والكل حاب يشوفو ..!! نانسي عَ الغالب تكون إمْشلّحة ..وعمركو شفتو ثلج لابس ..؟؟ نانسي لما تيجي على أي بلد ؛ كل البلد بتعرف وتتهيّأ لاستقبالها ..والثلج كمان لما ييجي كل البلد بتعرف ؛ بس مش عارف البلد توخذ حذرها وإلاّ لأ..؟؟!! نانسي لما تشوفها تتخيّل فتاة أحلامك ..والثلج لما تشوفوا تتخيّل فتاة ( إِحْرامك )..ويا رب تفهموا هاي النقطة بالذات ..!!
الثلج يخلّيك عايش على أعصابك لحد ما يذوب ..و نانسي تخليك عايش على أعصابك لحد ما تخلِّص وصلتها ..!! الثلج إذا لعبت فيه يخليك تبدِّل ملابسك ..وأعتقد نانسي كذلك ..!! الثلج يمزلط و يزحلق ..إيش رأيكو نانسي هيك وإلاّ مش هيك ..؟؟؟
المهم لو بدّي أعدِّد الأشياء المشتركة بين نانسي و الثلج ما أخلص من هون لساعتين ويمكن أكثر ..!! لذا ..وباعتبار ما سبق ..واعتباري إمبارح قلتلكوا : إحنا في الغور محرومين من الثلج ؛ فإنني نيابة عن أهل الغور جميعاً أقبل ( كحل وسط ) استبدال الثلج بنانسي وإرسالها إلى الأغوار فوراً ..بشرط ارسال قوات كثيفة من الحماية و قنابل تفريق الجموع ..لأني لا أضمن النتائج ..وعلى فكرة هيك الثلج كمان ؛غير مضمون النتائج ...!!
بقي ان أذكر لكم ملاحظة مهمة جدا جداً : وهي أهم وجه اختلاف وليس شبهاً بين الثلج ونانسي ...الثلج هو إللي بذوب فينا ..أمّا نانسي فنحن الذين نذوب فيها..!!!!