فينك يا اسمراني ..؟؟ فينك يا ( عبده ) يا ابن مصر ..؟ فينك يا حتّة منا ..؟؟ فينك يا إللي فتّحت عيونّا على حاجات ما كُنّاش نعرفها ..؟؟ فاكر يا ( عم عبده ) لمّا عملت الوحدة مع سورية وكتير من الناس إللي عاملين روحهم ( هَلُمّا ) طلعوا ولا حاجة ..؟؟ فاكر لمّا ( الأمريكاني ابن الأمريكاني ) وقف في وِشّك آل عاوز إيه ..؟؟ آلْ عاوز يشيلك من مطرحك آلْ ..بس إيه ..؟؟ إنت كنت كدة وأكتر من كدة ؛ ما خفتش ولا طاطيت ولا ارتعبت ولا بكيت ..وقّفتْ الأمريكاني ورجع تاني يحسب لينا ألف حساب ..!!فينك يا ( عم عبده ) فينك ..؟؟ شفت الأمريكاني عمل فينا إيه من بعدك ..؟؟ سرق الفول المدمس و سرق الشطّة ..وشربنا شربات اغتصابو لينا ..ويا ريت وقفت الحكاية عند كده ..دا كان حاطط في الشربات منوِّمْ ..سرق هدومنا الداخليّة ..مع إنها هدوم مش ولا بُدْ ..بس أهي ساترانا و مْغطية أي بتاع ..؟؟ شُفت يا عم عبده إزاي اتسرقنا عينك عينك وما فيش خِِشَة ولا ما يستحون..!!
عم عبده ؛ جمال يا ناصر..سبتنا ورحت ..وصرنا من بعدك ؛ إزا واحد فتح ( بُقّة ) بكلمة عن ( الوحدة ) يزفوه زفّة أولاد الشوارع : أهو أهو ؛ العبيط أهو ..!! والعيال ( إللي إنت عارفهم ) يحدفوه في الطوب و يبهدلوه آخر بهدلة ولا زنقة الأتوبيسات في يوم العيد ..!! ومش كدة وبس يا عم عبده ؛ ما فيش حد بجيب في سيرة الوحدة إلاّ بطلّعوا في جتّة أهلو ( العِرَسْ الفطسانة ) وإذا مش فطسانة يفطّسوها بإيديهم و يطلعوها في جتِّةْ إللي خلِّفوه ..!!
آآآآآآآآه يا عم عبده ..فين زمانك راح ..؟؟ فين السد العالي وأيّام السد العالي ..صار بينا و بين كرامتنا ( سد عالي ) وأعلى من العالي..!! إحنا مجروحين من ( أولاد البتاع ) و ( بتاع البتاع ) ..!! خلاص ما فيش فايدة فيهم..خلاص فتحوا إللي ما كنش لازم يِتْفِتِحْ ؛ ما فيش مصر عندهم ..كلّو محصّل بعضو ؛ و بعضو تايه من يومها ؛ الكل يدوّر عليه و مش لاقيينو ..بعضو راح ..ولمّا راح ؛ لا اراح ولا استراح ..تعبنا أوي ويّاه ..ملفِّفْنا كعب داير ؛ و ما فيش حتّة إلاّ و جرجرونا عليها ..ما فيش خُرم إبرة فيك يا بلدي إلاّ تئن و توِنّ من الغربة ؛ والبلد جوّانا ؛ مش إحنا إللي جوّاها ..!!
شُفتْ إللي عملوه بينا أولاد اللزينا..!! بس ولا يهمّك يا عم عبده ..لسة فيه رجّالة وبتاكل الزلط وأُمْ الزلط كمان ..ولسّة فيه ناس تهتف باسمك و عايشين على زكراك وماشيين على خطاك ..ومهما كبرت الزفّة.. ومهما حدّفونا في الطوب ..ومهما أجت الطوبة في المعطوبة.. حَنِفْضَلْ نمشي في العبط للآخِرْ ..و حنفضل نطالب بالوحدة بالبيت و الشارع و بزنقة الأتوبيسات ..!! هُمّا معاهم الأمريكاني والجن الأزرق ..وإحنا معنا ربنا و نور نبينا و راجل من ظهر راجل إسمو ( عم عبده ؛ جمال عبد الناصر )..!!