لم يكتفِ بالطرق على الباب ، بل كان يضغط على الجرس ايضاً بشكل متواصل بين جولات «التطبيل» الشديد ..خرجتُ مسرعاً و»البشكير» على كتفي ، فتحت الباب..كان واقفاً وينظر الى الشرق وفي يده اليمين مسبحة..

- انا : تفضل ابو يحيى.

- أبو يحيى: ليش مسكّر الماخوذ.؟؟

- أنا: أي ماخوذ؟

- أبو يحيى: «البوبايل»!!*

- أنا: والله كنت نايم، فوت جاي!!

- ابو يحيى: ابديش!! تروح معي تا نردّ الزعلانة!!

- أنا: حجي أي زعلانة انا قعّيد نوم!!

- ابو يحيى: بنت عودة «الامزط»

- انا: أي وحده فيهن مهو عنده 6.

- ابو يحيى : ولك كنة فالح الاطرم مرة ناجح..

- انا: اف..اف..اف.. مرة ناجح زعلانة؟؟.. صارلها 30سنة معاه زي السمن ع العسل شو جدّ بينهم!!

- ابو يحيى: والله سولافة ما بتتسولف!

- انا: بده يتجوز عليها؟

- ابو يحيى: لا يا زلمة..

- انا: صاير يضربها..

- ابو يحيى: ولك لا..

- انا: مبطّل(...)؟؟

- ابو يحيى: سبعك وسبع حكيك!!

- انا: لعاد ايش..؟؟

- ابو يحيى: هذيك اليوم حاطه عينها في عينه..فـــ...

- أنا: فـــ..ايش؟؟ احكي..!!

- ابو يحيى: فــ....اكتشفت انه احول!! راحت تركته!.

- انا: واااال..بعد ثلاثين سنة جيزة هسع عرفت انه ناجح احول؟؟!

- ابو يحيى: من ورا هالثورات ..و سولافة « الحشيش العربي» ما بدري الربيع العربي «قوي وجهها»شوي..فرفعت عينها بعين جوزها..هوووب اكتشتفت انه احول..راحت حملت حالها وتركته..

- انا: لا حول ولا قوة ال بالله ..طيب هسع بلبس وبآجي معك!!

- ابو يحيى: لد، البس سترة الدنيا برد، بجوز نقعد تحت الدالية !!

- انا: كيف مش بدنا نفوت نقعد بدار الزلمة؟!

- ابو يحيى: مهو بناته الــ 6 كلهن زعلانات عنده بالدار ..ومحتلات غرفة «المجلس».. مساوياته (مجلس انتقالي) .

- انا: هسع بلبس وبآجي معك...

- ابو يحيى: عجّلًًًًْ ..انا بدي اتدرّج قدّامك لراس الشارع..ينعن «عودة الامزط» وينعن شوفه !!

• بوبايل:موبايل.



ahmedalzoubi@hotmail.com

(الرأي)