عمون - أطلق نشطاء على موقع التواصل الاجتماعي فيسبوك حملة اسموها "لو كنت أمين عمان" ، ينشر خلالها آراء المواطنين بأمين عمان وعمله طيلة السنوات الماضية، حيث جاء في وصف الحملة "شاركنا أفكارك واقتراحاتك لو كنت أمين عمّان شو رح تعمل ؟"

عمون رصدت آراءً نشرت على صفحة الحملة، بعضها حمل صبغة الجدية وأكثرها غلب عليها طابع السخرية .

يزن عواد قال "ولا اشي مهم اكثر من انه نزبط المناهل الي كسرت السيارات والله ماخرب السيارات الا المناهل ولا حدا فيهم سائل .. والا المطبات الي مالها داعي ببعض المناطق ، يعني ما بتكون مطبات ، هي شبه مطب بكون الاسفلت مش مطابق مع بقية الشارع وتحته تمديد اسلاك او مواسير مش عارف شو بحطوا .. يا بسيبوها يا برقعوا ترقيع مشي حالك والشعب يوكلها والسيارة بسببهم عالعناية المركزة .. كله عدم اهتمام ومسؤولية وامانة بشغلهم .. ياريت يعملوا شغلة مفيدة بحياتهم وتفيد المجتمع لمرة وحدة بس .. وفي منهل عندي بالمنطقة تقول برج ايفيل طالع لبرا وحوليه محفر وقد ماصارت حوادث بسبب هالحفرة .. الله المستعان على كل حال".

فرح الربيع تقول "إذا صرت أمين عمان راح اقلكو ضل حدا يسكن بالتسوية؟؟؟ "

عمر صمادي اخذ دوره كأمين للعاصمة وقال "بشيل الحفر وبقيم المطبات ، وبعمل مناهل للانفاق يلي بتسكر كل شتوية، وبزرع عمان كاميرات كل شارع كاميرتين ثلاث ، بحط نظام cctv مثل دبي ، وبنزل رواتب الموظفين الي بياخذوا نص موازنة الامانة ، وبزيد رواتب عمال الوطن والعمال الي عنجد بتعبوا ، و بزفت الشوارع الي ما بتصلح للمشي ، وبنزل راتبي لاني ما بستحق هيك راتب ، وبعمل محطة توليد الكهرباء عن طريق النفايات وغاز الميثان وهيك بكفي ما رح اعمل اكثر ".


عائشة الأرناؤوط عبرت بأنها تود معرفة عمل الأمين قبل الإجابة"انا لأعرف شو شغلتو بالزبط بعدين بقرر.."..

غادة المومني علقت على حالات غرق العاصمة ساخرة "بحفر برك بالارض عشان لما تشتي ميغرقوش الناس ويتسبحو شوي".

يوسف يقول "لو كنت امين عمان رح اركب سيارة بتمشي 400 كيلو فقط ب 1$".

فادي حسّان "لو كنت آمين عمان بمنع بناء التسوية وبسكر الانفاق وبخلي بالأردن جسور وبرفع أجور عمال النظافة وبرفع راتبي كمان بالمرة "

رائدة الزغطيط علقت على مشروع الباص السريع "كنت راح اوعدكم انه راح نخلص مشروع الباص السريع بال 2036 ".

حسين وهبية "بمشي بعمان بدون كاميرات.....ما بتحجج بمواسير التصريف الصحي ولا بحفر المقاولين للشوارع ....بحاول اكون "أمين" بمسؤولية عمان".

هبة محمد رفعت شعار "(لا لقناني المي الصفرا على جوانب الطريق)!"

حمزة حراحشة "كان شلت المطب الي قدام دارنا لانو عباره عن جبل مش مطب"

عبدالله النجار يقول "كان إهتميت بالشرقية زي الغربية و إختصرت المشاريع اللي بتكلّف ملايين و هي زينة معمولة جنب شارع مش مزفّت منيح و كُلّه حُفر.
كنت طلعت واسيت الناس لو غرقت شوارع و اعترفت بغلطي، مش اطلع أعاتب اللي سكن بالطابق الأرضي..
كان كمّلت الباص السّريع .
كان عملت تسهيلات للمستثمرين حتّى أنعش الاقتصاد و اجيب مشاريع عالبلد".

سارة النوباني "وين ما اروح ما بدفع الفاتورة بقضيها عزايم"

نصر العدوان عاد لمشكلة المطبات فيقول "كل حفره بعمل عليها مطب و كل مطب بعمل عليه حفرة"